शिर्डी (जनता आवाज वृत्तसेवा):– चैन्नई येथील साईभक्त जितेंद्र उमेडी यांनी श्री साईबाबांच्या चरणी १५ किलो वजनाची १८५ ग्रॅम शुद्ध सोन्याचा मुलामा दिलेली तांब्याची छत्री अर्पण केली.
ही छत्री श्री साईबाबा संस्थानचे उपमुख्य कार्यकारी अधिकारी श्री भिमराज दराडे यांच्याकडे सुपूर्द करण्यात आली असून, आज ती श्री साईबाबांच्या समाधी मंदिरातील मूर्तीवर प्रतिष्ठापित करण्यात आली. श्री साईबाबांच्या भक्तीभावाचे प्रतीक असलेली ही छत्री आता मंदिराच्या सौंदर्यात भर घालत आहे.
याच साईभक्ताने चेकद्वारे श्री साईबाबा संस्थानला २३ लाख रुपयांची देणगी दिली असल्‍याची माहिती श्री दराडे यांनी दिली.
या निमित्त श्री साईबाबा संस्थानच्या वतीने उपमुख्य कार्यकारी अधिकारी श्री दराडे यांनी साईभक्त जितेंद्र उमेडी यांचा सत्कार करून त्यांचे मनःपूर्वक आभार मानले.
दराडे म्हणाले, “साईभक्त जितेंद्र उमेडी यांचे हे दान आणि श्रद्धा भाविकांसाठी प्रेरणादायी आहे. त्यांच्या या योगदानातून संस्थानच्या धार्मिक व समाजोपयोगी कार्यांना अधिक बळ मिळेल.”
