अहिल्यानगर (जनता आवाज वृत्तसेवा):- राज्य सरकारने अहिल्यानगर जिल्ह्यात शासकीय वैद्यकीय महाविद्यालय मंजूर केले आहे. हे वैद्यकीय महाविद्यालय अहिल्यानगर शहरातच व्हावे या मागणीसाठी गुरवारी शहराचे आमदार संग्राम जगताप यांनी मुख्यमंत्री देवेंद्र फडणवीस व उपमुख्यमंत्री अजित पवार यांची विधीभवनात भेट घेऊन निवेदन दिले. यावेळी शासकीय वैद्यकीय महाविद्यालय अहिल्यानगर शहरातच होणार अशी जोरदार घोषणा मुख्यमंत्री देवेंद्र फडणवीस यांनी करून आ.जगताप यांना आश्वासन दिले.
यावेळी दिलेल्या निवेदनात आ.संग्राम जगताप यांनी नमूद केले आहे की, अहिल्यानगर जिल्ह्यामध्ये शासकीय वैद्यकीय महाविद्यालय मंजूर झाले आहे. हे महाविद्यालय शहरातील मध्यवर्ती ठिकाणी होणे गरजेचे आहे. जेणेकरुन शहरातील सर्व नागरीकांसाठी वैद्यकीय सुविधा उपलब्ध होण्याच्या दृष्टीने सोयीचे होईल.
या वैद्यकीय महाविद्यालयासाठी अहिल्यानगर शहरातील मध्यवर्ती भाग असलेल्या नालेगाव परिसरातील कृषी विभागाची २५ एकर जमीन उपलब्ध आहे. सध्या ही जागा वापरात नसून त्या जागी जर सदर शासकीय वैद्यकीय महाविद्यालय सुरु केल्यास सर्व नागरिकांची चांगली सोय होईल. अहिल्यानगर जिल्ह्यासह सोलापूर, पुणे व मनमाड जिल्हांना जोडणारा हा मध्यवर्ती भाग आहे.
