श्रीरामपूर ( जनता आवाज वृत्तसेवा ):-श्रीरामपूर तालुक्यातील वडाळा महादेव परिसरात काल रात्री युवकावर दोन बिबट्यांनी हल्ला केल्याची धक्कादायक घटना घडली आहे. सदर घटनेत हा युवक जखमी झाला असून त्याला शहरातील साखर कामगार हॉस्पिटलमध्ये उपचारासाठी दाखल करण्यात आले आहे.
वडाळा महादेव परिसरातील श्री.छत्रपती शिवाजी महाराज विद्यालय रोडवर राहणारा दीपक एकनाथ शिंदे (वय 32) हा तरुण काल रात्री 8 वाजेच्या सुमारास दूध घालून घरी परतत असताना वस्तीजवळच दोन बिबट्यांनी त्याच्यावर एकाचवेळी हल्ला केला.बिबट्याच्या हल्ल्याने दीपक शिंदे हा तरुण गाडीवरून खाली पडला. बिबट्याच्या हल्ल्यामध्ये त्याच्या गुडघ्याला व पायाला जखम झाली आहे. अचानकपणे बिबट्याचा हल्ला झाल्याने तरुणाला काय करावे हे समजले नाही.
घाबरलेल्या अवस्थेमध्येच त्याने मोठ्याने मदतीसाठी आरडाओरडा केला. त्यामुळे वस्तीवरील नागरिक घटनास्थळी जमा झाले. त्याला तात्काळ श्रीरामपुरातील साखर कामगार हॉस्पिटलमध्ये उपचारासाठी दाखल करण्यात आले होते. त्यानंतर नेवासा रोडवरील राऊतवस्ती नजीकच्या वटवृक्ष तसेच दर्गाह जवळील रोड येथे याच दोन बिबट्यांनी आणखी एका तरूणावर हल्ला केला. वडाळा महादेव येथील गांगुर्डे नामक तरूण वडाळ्याहून श्रीरामपूरला जात असताना या ठिकाणी मोटारसायकलच्या लाईटमध्ये हे दोन बिबटे त्याला दिसले.त्यानंतर या तरूणाने आपली मोटारसायकल जोरात तेथुन काढून घेतली.बिबट्यांच्या हल्ल्याने परिसरात भितीचे वातावरण निर्माण झाले असून वनविभागाने परिसरात त्वरीत पिंजरा लावावा,अशी मागणी या परिसरातिल नागरीकांनी केली आहे.
