अहिल्यानगर(जनता आवाज वृत्तसेवा) :- अहिल्यानगर जिल्हा सहकारी बँकेच्या अध्यक्षपदाची सूत्रे डॉ. सुजय विखे पाटील यांनी आज अधिकृतपणे स्वीकारली. पदभार स्वीकारल्यानंतर त्यांनी बँकेच्या आगामी कामकाजाची दिशा स्पष्ट करताना शेतकऱ्यांचे हित केंद्रस्थानी ठेवून निर्णय घेतले जातील, अशी भूमिका मांडली. बँकेच्या माध्यमातून शेतकऱ्यांना अधिक सक्षम सुविधा आणि योजनांचा लाभ मिळवून देण्यावर आपला भर राहणार असल्याचे त्यांनी सांगितले.
अध्यक्षपदाची जबाबदारी स्वीकारल्यानंतर माध्यमांशी संवाद साधताना डॉ. विखे पाटील म्हणाले की, पदभार स्वीकारल्यानंतर तातडीने लोकप्रिय निर्णय घेण्यापेक्षा सर्वप्रथम बँकेची आर्थिक परिस्थिती, सध्याचे कामकाज आणि उपलब्ध योजनांचा सखोल अभ्यास करणे आवश्यक आहे. बँकेची आर्थिक स्थिती समजून घेतल्यानंतर शेतकऱ्यांच्या हिताचे आणि बँकेच्या प्रगतीला पूरक ठरणारे निर्णय घेतले जातील.
शेतकऱ्यांसाठी बँकेच्या माध्यमातून राबविण्यात येणाऱ्या योजना अधिक प्रभावीपणे पोहोचविण्याचा प्रयत्न केला जाणार आहे. यासाठी पुणे आणि मुंबई जिल्हा सहकारी बँकांच्या कामकाजाचा तसेच त्यांनी राबविलेल्या विविध योजनांचा अभ्यास केला जाणार असल्याचे त्यांनी स्पष्ट केले. सहकार क्षेत्रातील चांगल्या उपक्रमांचा अवलंब करून अहिल्यानगर जिल्हा सहकारी बँकेच्या कामकाजात आवश्यक सुधारणा करण्यावर भर राहणार आहे.
बँकेच्या नावातील बदलाबाबतही त्यांनी भूमिका स्पष्ट केली. अहमदनगर जिल्हा सहकारी बँकेऐवजी अहिल्यानगर जिल्हा सहकारी बँक असे नामकरण करण्याचा प्रस्ताव असून, यासाठी रिझर्व्ह बँकेशी संबंधित तांत्रिक अडचणी दूर करण्याबाबत चर्चा केली जाणार असल्याचे त्यांनी सांगितले.
ऊसदराच्या प्रश्नावर बोलताना त्यांनी शेतकरी संघटनेच्या मागण्या आणि भूमिका समजून घेतल्याचे सांगितले. शेतकऱ्यांना त्यांच्या उसाला योग्य दर मिळावा, त्याचवेळी सहकारी साखर कारखान्यांचे आर्थिक गणितही बिघडू नये, यासाठी समन्वयातून मार्ग काढण्याचा प्रयत्न केला जाईल. आगामी काळातील दुष्काळी परिस्थिती आणि कारखान्यांसमोरील संभाव्य अडचणी लक्षात घेऊन सर्व घटकांच्या हिताचा विचार करून निर्णय घेणे आवश्यक असल्याचे त्यांनी नमूद केले.
जिल्हा सहकारी बँक ही ग्रामीण अर्थव्यवस्थेचा आणि शेतकऱ्यांच्या आर्थिक व्यवहारांचा महत्त्वाचा आधार आहे. त्यामुळे बँकेचा कारभार अधिक सक्षम, पारदर्शक आणि शेतकरीकेंद्रित करण्यासाठी प्रयत्न केले जातील, अशी भूमिका डॉ. सुजय विखे पाटील यांनी पदभार स्वीकारल्यानंतर व्यक्त केली.




Total Users : 684192